والدة عامل الدليفري ضحية الدهس بالإسكندرية: كان بيشقى عشان يحقق طموحاته | بث مباشر

سيطرت حالة كبيرة من الحزن على والدة عامل دليفري ضحية حادث دهس أسفل عجلات سيارة يقودها شباب غير مصريين، وذلك بالتزامن مع مرور 40 يومًا على وفاته إثر هذا الحادث المؤسف.

حزن والدة عامل الدليفري ضحية الدهس بالإسكندرية

وقالت والدة عامل الدليفري إن المتهمين كانوا يقودون السيارة برعونة شديدة، فدهسوا نجلها أسفل سيارتهم دون رحمة أو شفقة.

وأضافت والدة عامل الدليفري: المتهمين مكنش عندهم أي رحمة بـ أحمد ابني.. داسوا عليه وبهدلوه بعد ما خبطوه واترمى على العربية.. حتى لما اتعلق في العربية سحلوه والله أعلم ابني كان حاسس بإيه ساعتها.

وأكدت والدة عامل الدليفري أنه توسط له أحد الأشخاص من قبل أسرة المتهمين من أجل تقديم واجب العزاء لها، وذلك قبل الأربعين بنحو يومين، إلا أنها رفضت ذلك بشكل نهائي.

واستكملت: أهل المتهمين كانوا عاوزين ييجوا يعزوني بس أنا رفضت لأني مش قابلة عزاهم ومش هقبل أي عزا لحد ما حق ابني يرجع.

وأوضحت والدة عامل الدليفري أن نجلها كان محبوبًا من الجميع ويتمتع بسيرة حسنة وطيبة، مضيفة: أحمد كان حنين وقلبه كان طيب.. راح في عز شبابه وكان شقيان عشان عنده طموحات كتير نفسه يحققها.

واختتمت حديثها: أحمد عيد ميلاده كان أول الشهر وكان هيتم 24 سنة.. كان شاب طموح وجميل ومتمكن من نفسه.. كان بيشتغل وظيفتين عشان يكون نفسه وعمره ما ضغطني في أي مصروف.. وكمان كان بيعتمد على نفسه في كل حاجة وكان عنده أمل كبير في الدنيا ولكن قضاء الله عمره انتهى.