أول تعليق من بائع الورد المصري علي فله: فرحت لما الناس اتصوروا معايا.. وبقالي 50 سنة في الشغلانة
تصدر فيديو لبائع الورد علي فله التريند؛ بسبب رقصه خلال إحدى الرحلات على مركب نيلي، وظهر بائع الورد وهو يرقص بخفة ظل وحركات عفوية على مقطع غنائي شهير، مما أثار إعجاب مستخدمي السوشيال ميديا.
أول تعليق من علي فله بائع الورد
وفي تصريحات خاصة لـ القاهرة 24، قال بائع الورد المصري علي فله: أنا في شغلانة بيع الورد دي أساسي وأنا حبيتها، بتغيرلي همومي، وكل يوم بشوف حد جديد، وأنا فيها من قبل ما ابني يتولد بسنين يعني تقريبا من 50 سنة، ودلوقتي بقيت مصر كلها والناس بتطلبني بالاسم في الأفراح، عشان أجبلهم ورد هناك، ولسه امبارح ناس كلموا ابني من السويس عايزينه يجي عندهم فرح هناك.
وعن سبب حبه لتلك المهنة أضاف: أنا بحب المهنة دي جدا، وبروح الأفراح بالذات عشان الناس كتير والمجال حلو، وبنزل الكورنيش والمراكب اللي هناك على الساحل، والناس كلها زبائن ليا، وأحيانا أولادي بيقولولي يا حاج علي كفاية عليك كده، وأحنا ولادك وعايزينك ترتاح، بس بقولهم القعدة تمرض الجسم وأنا الشغلانة دي بقت في دمي والشغل مش عيب، وبضحك معاهم وأقولهم أنا لسه شباب ومتعبتش وبحب الشغلانة دي والناس كلها بتحبني، وعندي استعداد أشتغل لآخر يوم في عمري بس مقعدش في البيت
وأكمل: أنا بحب الشغل واللي بيحب حاجة بيتقنها، وإمبارح كنت عند مدرسة ببيع ورد واتفاجت أن كل الطلاب جايين يتصوروا معايا، وبيقولولي ياعمو أنت مكسر الدنيا، والناس عند ابني في الشغل قالوله والدك بقى تريند على سوشيال ميديا، وأما سمعت الكلام ده فرحت جدًا جدًا بحب الناس.
