سارة سلامة عن انتقادات تغيير شكلها: قالوا لي دمرتِ نفسك وأنا عملت رتوش.. وبدفع ضريبة نجاحي من نفسيتي | فيديو
أعربت الفنانة سارة سلامة، عن استيائها الشديد بسبب الانتقادات التي تلقتها خلال الفترة الماضية منذ بداية عرض مسلسل نقطة سودة، بسبب تغيير ملامحها، مؤكدة أنها لم تُجرِ أي عمليات تجميل كما يزعم الجمهور.
سارة سلامة ترد على انتقادات تغيير شكلها
وقالت سارة سلامة، في ندوتها بالقاهرة 24: أنا اتكلمت كتير جدًا وفهّمت الناس كتير جدًا، اللي في مسلسل نقطة سودة دي شخصية فيروز مش شخصيتي أنا، والناس مش عايزين يفهموا إني ممثلة، أنا مش الشخصية اللي في المسلسل، أنا عملت رتوش عادية لكن مش عمليات تجميل، والفكرة إن كل واحد حر، ووضحت علشان لازم أوضح، المطلوب مني أعمل إيه تاني، يعني أنا مش ظاهرة طول الوقت وأي حد ناجح لازم يبقى في حاجات سلبية وحملات هجوم.
وأضافت سارة سلامة: الصورة من الأساس ملعوب فيها وفيه ناس تبع الحملات بينتقموا مني، فمبقاش فارق معايا، أنا اتخضيت ودفعت ضريبة ده من نفسيتي، لازم كل عمل يكون فيه انتقاد، ولكن ده نجاح مع إنه بيأثر فيا لأني ضد التجريح فيا ولا في أي حد، التجريح عيب، اللي عايز يعلق يعلق بـ احترام، لكن لو بشكل فيه إهانة أنا برفضه.
وأضافت سارة سلامة: الناس فاكرة إن الفنان مبيمرش بأي حاجة وحشة ولا نفسيته بتتعب، ده فيه ناس بتقولي حرام يا بنتي دمرتي نفسك، ده ضحك بالنسبة ليا، أنا بني آدمة وبتضايق وبزعل وبييجي لي أمراض، ربنا يهدي الناس اللي بيعملوا حملات الهجوم.
