شدني من شعري وضربني.. فتاة تروي تفاصيل تعرضها للتحرش والاعتداء في أوتوبيس بمسطرد

نشرت فتاة تدعى ل. ن، على صفحتها الشخصية، منشورا تشير فيه إلى تعرضها للتحرش والاعتداء بالضرب أثناء ركوبها أوتوبيس من مسطرد للعتبة.

وقالت الفتاة: كنت قاعدة والكرسي اللي جنبي فاضي، جه راجل كبير في السن لابس نضارة سودا وقعد جنبي، وفجأة لقيته بيلمسني.

فتاة تروي تفاصيل تعرضها للتحرش والاعتداء في أوتوبيس بمسطرد

وأضافت: حاولت أن أحسن الظن في البداية وافتكرت إنه مش واخد باله، بس لما كرر الحركة بشكل صريح فهمت إنه بيتحرش بيا، بدأت أزعق وأقول له يبعد إيده.

وتابعت: كل ما اطلب منه يعديني كان بيقول لأ مش هقوم، والناس بدأت تطلب منه يغير مكانه، لكنه فضل مصر على إنه يقعد، لحد ما بدأت أزعق بصوت عالي.

وأشارت إلى أن الأمور تصاعدت عندما فوجئت بهجومه وقالت: مسكني من شعري وبدأ يضربني قدام الناس، وأنا بصرخ وبعيط، لحد ما كام واحد قاموا وبعدوه عني.

واستطردت: أنا مش هسكت، وهعمل كل اللي أقدر عليه علشان ياخد عقابه، إحنا مش مباحين، ومش لازم أي بنت تسكت لو اتعرضت لموقف زي ده.