مايا الشربيني: الرجالة مش بيخونوا أكتر من الستات.. والسوشيال ميديا خلت الخيانة أسهل
أكدت الإعلامية مايا الشربيني، خلال برنامجها ساعة زمن، أن الخيانة ليست صفة مرتبطة بجنس معين، بل هي دليل على خلل في شخصية الإنسان.
تصريحات مايا الشربيني
وقالت مايا الشربيني في برنامجها ساعة زمن عبر قناة Ten: نسبة الرجالة الخاينيين مش أكتر من الستات ولا حاجة، الخيانة طبع مش صفة ذكورية ولا أنثوية، ودليل على طمع الشخص وعدم اكتفائه.
وأشارت إلى أن التطور التكنولوجي وانتشار وسائل التواصل الاجتماعي ساعدا في جعل الخيانة أقرب وأسهل من أي وقت مضى، موضحة: السوشيال ميديا قربت المسافات وخربت النفوس، بقت الخيانة دلوقتي مجرد رسالة أو تعليق يتحول لفخ عاطفي.
وأضافت: الخيانة مش مقياسها مين بيعملها أكتر، لكن مقياسها حجم الأذى اللي بتسببه للطرف التاني، اللي بيخون بيدور على مكسب سريع أو متعة مؤقتة، بدون ما يحسب التمن الحقيقي للي بيعمله.
واختتمت حديثها بأن الخيانة دليل على ضعف الشخص واحترامه لنفسه، مشددة على أن المجتمع يجب أن يتوقف عن إلصاق الخيانة بجنس معين، لأن الجميع معرض للوقوع في هذا الفعل إذا غابت القيم والمبادئ.
وسبق أن قالت مايا الشربيني: هيبة الرجل جزء أساسي من شخصيته في مجتمعنا، والحب والاهتمام مش لازم يكونوا بحركات مستوردة من ثقافات غربية زي الأفلام الأجنبية، في طرق كتير ممكن يعبر بيها الراجل عن مشاعره من غير ما يتخلى عن احترامه لنفسه وثقافته.
وأشارت إلى أن المرأة أصبحت شريكًا أساسيًا في الحياة العملية والاجتماعية، والرجل يشارك في مهام البيت وتربية الأبناء، مما يعكس التغيرات الكبيرة في دور كل طرف بالمجتمع.
واختتمت تصريحاتها بالقول: القوامة مش في السيطرة، بل في الحكمة، والنجاح الحقيقي بيبدأ لما الراجل والست يقفوا جنب بعض على قدم المساواة.
