أيتن عامر عن فيديو خناقة طالبات بمدرسة شهيرة بالتجمع: مصدومة ولازم البنت تاخد حقها بالقانون
علقت الفنانة أيتن عامر على فيديو تعدي طالبة على زميلتها داخل مدرسة مملوكة لشركة أجنبية شهيرة بالتجمع، معبرة عن دهشتها من هذه الحادثة الغريبة، والموقف الصعب الذي تعرضت له الفتاة بالضرب على يد زميلتها ووقوف الطلاب للتصوير دون تدخل.
وقالت أيتن عامر: اتضايقت من فيديو خناقة البنات في مدرسة بيقولوا إنها من المدارس المهمة، بسبب أن زمايل البنت واقفين في المدرسة فتحين تلفوناتهم وبيصوروا والبنت واقعة على الأرض ومناخيرها مكسورة وبتنزف، أنا عندي حالة صدمة، فجأة تخيلت حد من ولادي في موقف زي ده، أقول لولادي لو شوفتوا موقف زي ده قدامكم تتدخلوا ولا لأ، هو إيه اللي بيحصل.. أنا مش قادرة أفهم إيه اللي بيحصل.. إحنا ليه وصلنا للدرجة دي.
خناقة طالبات بمدرسة شهيرة بالتجمع
وأضافت أيتن عامر في لايف عبر حسابها على موقف فيسبوك: إحنا لو مربناش ولادنا كويس كده بنساعد أن في جيل بيطلع أخلاقه وطباعه مش مفهومة وسلوكة غريب، أنا عندي حالة صدمة من وقت ما شوفت الفيديو.. مش هتكلم على الألفاظ اللي البنت كانت بتشتم بيها.. أنا بتكلم على رد فعل الولاد.. أخاف أقول لأولادي وأعلمهم لو شوفتوا موقف قدامكم حد بيضرب تدخلوا تدافعوا عنه، ولادي يتأذوا.. وفي نفس الوقت قلبي موجوع على البنت ونفسي مامتها بجد تاخد حقها بالقانون.. الحاجات دي مفهاش صلح.. لأن اللي حصل مرعب.
وتابعت: أتمنى البنت حقها يرجع بأي شكل ومامتها تبقى قوية وميصعبش عليها اللي غلط، أنا لو مكانها مكنتش هعرف أعمل إيه.. هنا في خط أحمر مينفعش حد يعديه.. إحنا وصلنا مرحلة صعبة ومينفعش نسيب ولادنا للدرجة دي.. فين المدرسة والأمن والمدرسين والمشرفين.. إزاي بنت أصغر منهم تضرب بالشكل ده.. عملت لهم إيه.
واختتمت أيتن عامر: متسبوش حاجة زي دي تحصل قدامكم وتتفرجوا وتصورا.. امنعوا الأذى.. مش دي أخلاقنا، مش إحنا.. العالم بقى غريب.. والناس طباعها وأخلاقها بقت غريبة.. أتمنى من أي حد يلفت نظر ولاده لو خايف يدخل حتى في موقف زي ده يطلب المساعدة.. علشان نعرف نعيش في الدنيا، كل فترة الأمور بتصعب أكتر وصعب على مخنا نصدقها.. عمري ما شوفت خناقة بنات بالشكل ده، لازم نربي ولادنا علشان يبقى في أمان، علشان يبقى في مجتمع بشكل أحسن وعلشان نعرف نعيش.. ربنا يحفظ ولادنا ويحميهم من كل شر لأن الموضوع بقى مرعب والحياة بقت غريبة.
