هيثم نبيل: عملت الموسيقى التصويرية لـ إش إش ورباعيات سيد الناس.. وممتن لـ ثقة محمد سامي فيا
كشف المطرب والملحن هيثم نبيل، تفاصيل أعماله المقبلة، موضحًا أنه سيقدم الموسيقى التصويرية لـ أعمال المخرج محمد سامي في رمضان 2025، في تعاون للمرة الثامنة.
وقال هيثم نبيل، في لقائه مع الإعلامية ياسمين عز في برنامجها كلام الناس: أنا عامل الموسيقى التصويرية في إش إش أنا وخالد نبيل، ودايمًا إحنا بنشتغل ودي سياسة محمد سامي أن كل حاجة جديدة بتبقى أجمد من اللي فات وأنا بشكره على الثقة اللي بيديهاني ده سابع أو ثامن عمل، وعامل الأغنية الدعائية لـ إش إش.
وأضاف هيثم نبيل: عملت الرباعيات بتاعة مسلسل سيد الناس بطولة عمرو سعد، وهنرجع أنا وأحمد سعد نعمل أغاني مع بعض تاني، وإن شاء الله الناس هتستمتع في سيد الناس بالعمل والأغاني.
هيثم نبيل: حميد الشاعري دعمني في بداياتي
كما تحدث هيثم نبيل، عن بدايته الفنية قائلًا: حميد الشاعري أنا قابلته الأول قبل ما أمضي مع شركة ليبية، وأنا مضيت معاهم لأن هو اللي بيشرف عليهم، وهو اللي قدم جيل التسعينات كله، وأنا مكنش ليا واسطة أنا راجل على الله، وعندي عزة نفس أوي وكنت اتكسف أروح أخبط على شركة من غير ما أخد ميعاد أو أروح وأتلطع، وحميد الشاعري دعمني في بدايتي لغاية ما مضيت مع طارق العريان.
