إحالة وحش الكون إلى الجنايات بتهمة الإتجار بالبشر بسبب بث مباشر لبناتها بملابس منزلية
قررت جهات التحقيق بالإسكندرية، إحالة السيدة المعروفة إعلاميًا بـ وحش الكون، إلى محكمة الجنايات، بعد توجيه تهمة الإتجار بالبشر إليها نتيجة بثها المباشر لبناتها عبر تطبيق تيك توك بملابس غير لائقة.
إحالة وحش الكون للجنايات
وقالت ف. أ، ابنة المتهمة، في التحقيقات: أنا عندي 16 سنة وعايشة أنا وأختي وجدي أبو ماما، وبابا منفصل عن ماما من حوالي 3 سنين، والانفصال ده مكنش طلاق، ماما كانت غضبانه من بابا وسابت البيت عشان هو كان صعب ومش بيصرف على البيت، وماما أخدتني أنا وأختي ورحنا على بيت جدو في محافظة الإسكندرية، لإن إحنا كنا عايشيين مع بابا في الأول بمحافظة البحيرة، ومن ساعة الانفصال بابا مش ييسأل علينا ولا بيكلمنا وإحنا محصلش بنا أي تواصل وماما من حوالي كام شهر رفعت دعوى خلع وكسبت القضية.
وأضافت: المعيشة كانت صعبة لأن بابا مش بيصرف علينا ولا بيبعت لماما أي فلوس، وماما مش بتشتغل ولا معاها أي تعليم عالي، وجدو كبير في السن وشغال بيمسح عربيات في الشارع وبيكسب 50 جنيه في اليوم، وهي الفلوس دي مش هتكفينا كلنا، ومكناش عارفين نشتري أي حاجة من اللي نفسنا فيها، ومن فترة فكرنا في كسب الفلوس من على النت، وساعتها دورت على فيديوهات إزاي اكسب فلوس من على النت وشفت فيديوهات على تطبيق تيك توك ومن طريق البث المباشر، وقلت لماما إن ممكن نكسب فلوس من على تطبيق تيك توك علشان نحسن حياتنا، وساعتها ماما ماكنتش مصدقة، وأنا شرحت ليها القصة وبدأنا نجرب نعمل بث على تيك توك، وأول بث كان على قناة اسمها برنسيسة إسكندرية، والقناة تم غلقها، والبث كان عبارة عن ظهورنا إحنا الـ3 وتقول أسامي المتابعين وتشكرهم بس لما القناة اتقفلت عملنا قناة جديدة باسم وحش الكون.
