مقتل شاب على يد جيرانه في شبرا الخيمة.. ووالدته: ضربوه بالمفك وموتوه قدام عيني| بث مباشر

شهدت مدينة شبرا الخيمة التابعة إلى محافظة القليوبية، واقعة مأساوية ومؤسفة، حيث لقي شاب يدعى محمد مصرعه على يد جيرانه؛ وذلك كان نتيجة نشوب خلافات مادية بينهما.

مقتل شاب على يد جيرانه في شبرا الخيمة

وقالت والدة المجني عليه إن نجلها يعمل في مجال بيع قطع غيار السيارات، وكذلك المتهمين كانوا يعملوا في نفس المجال، لذلك اشترى نجلها منهم بعض قطع الغيار اللازمة له.

وتابعت: المتهمين دول 2 إخوات جيرانا ومتربين سوا.. ابني خد شغل منهم بس طلع بايظ ولما طلب يرجعه مرضيوش.. واحد منهم اتصل بجوزي وقاله ابنك عليه فلوس شغل.. جوزي راح اداله الفلوس عشان ينهي المشكلة وقاله ملكش دعوة بابني.

وأضافت والدة المجني عليه أنه بعد فترة اشترى نجلها منهم قطع غيار للمرة الثانية، ولكنها أيضًا لم تكن صالحة للاستخدام فنشبت مشاجرة بينهم.

وواصلت: ابني للأسف خد منهم شغل تاني وبردوا طلع بايظ وحصل نفس المشكلة.. المتهمين اتخانقوا مع ابني وواحد منه ضربه بالمفك في راسه.. ابني حبيبي قلب أمه وقع على الأرض ومات على طول.. أنا وقعت من طولي لما شوفته بيموت قدامي.

وأوضحت والدة المجني عليه أن المتهمين أنهوا حياة نجلها بكل غدر ودون أي شفقة أو رحمة، مختتمة: صعب عليا إن ابني الكبير زهرة شبابي يروح مني.. كان كل حاجة في حياتي ابني وصاحبي وسندي في الدنيا.. أنا قلبي محروق على ضنايا اللي مات غدر ومش عاوزة غير حقه.