لو الموقف اتكرر مش هنتراجع لحظة.. القاهرة 24 يكرم أبطال حريق كعابيش بعد إنقاذهم 3 أطفال | بث مباشر
حرص القاهرة 24 على استقبال شابين من أبطال حريق كعابيش في منطقة فيصل بالجيزة، والذين كان لهم دورًا بطوليًا في إنقاذ حياة 3 أطفال إثر نشوب حريق داخل شقة سكنية في الطابق الـ11 بأحد العقارات.
القاهرة 24 يكرم أبطال حريق كعابيش
وروى الشاب كريم مشاهد وكواليس عن الحادث، حيث قال إن البداية تعود عندما كان في طريقه إلى عمله في تمام الساعة التاسعة صباحًا، وكان يمر كعادته من الشارع الكائن به العقار محل الحريق، ولاحظ تجمع عدد من المارة أمام العقار، مضيفا: وقفت أبص لقيت فيه حريق داخل شقة والموضوع شكله كان كبير وصعب، وطلعت مع كذا حد وكان معايا محمد من الناس اللي ساعدوا معايا.. حاولنا نكسر باب الشقة مقدرناش من شدة الدخان والدنيا كانت ضلمة.
وأشار الشاب كريم إلى أنه توجه للطابق العاشر على الفور واستأذن من أحد السكان أن يدخل شقته السكنية حتى يستطيع الوصول للشقة محل الحريق، في الطابق الحادي عشر، وذلك عن طريق الشرفة.
وأردف: خليت محمد يطلع الأول على البلكونة لأنه وزنه أخف مني، وأنا كنت بساعده.. والحمد لله قدر يوصل للبلكونة ويمسك في الحديد.. الموضوع كان صعب ومكنش فيه حد هيقدر يعمله لوحده، ومحمد ساعدني أطلع وراه للبلكونة في الشقة اللي فيها الحريق.. ولما طلعنا لقينا 3 أطفال منهم بنت كانت منهارة وبتعيط.. والاتنين التانيين كانوا مغمى عليهم من الحريق والحمد لله قدرنا نلحقهم.
ولفت إلى أنه إذا مر عليه هذا الموقف مرة أخرى بالطبع سيكرر ما فعله ولن يشعر بالخوف على نفسه، معقبا: الواحد عمره ما هيمر عليه الموقف ده ومش هيعيده تاني، بالعكس لو الموقف ده عدى علينا تاني وكان أصعب من كده بردو هنساعد، وسبحان الله ربنا هو اللي بيسخر الواحد عشان يساعد غيره.
من جانبه، قال الشاب محمد، أحد أبطال حريق كعابيش، إنه بذل جهدًا كبيرًا خلال إنزال الأطفال من الشرفة بمساعدة الشاب كريم، وكان الموقف صعبًا ويحتاج للتصرف بهدوء وبسرعة في نفس الوقت.
وأردف: وأنا شايل البنت عشان أنزلها من البلكونة ومتشعلقين كانت خايفة.. وقولت لا قدر الله لو وقعت أنا هقع معاها ومش هسيبها تروح مني.. الفضل في ده كله يرجع لـ ربنا سبحانه وتعالى.. دي مش جرأة ولا إحنا قلبنا جامد عشان نعمل كده.
وأوضح الشاب محمد أنه شعر بأن الطفلة التي كان ينقذها وكأنها ابنته وتستغيث به، لذلك لم يحسب أي مخاطر وكان يريد أن ينقذها وأشقائها فقط.
