لسرقة السيارات.. سيدة تروي تفاصيل تعرضها لحيلة نصب جديدة تستهدف جراجات المولات والأماكن الشهيرة

كشف حساب على منصة فيسبوك، باسم شيماء البشلاوي، حيلة نصب جديدة، لم تكن في الحسبان، تستهدف الأماكن الخاصة بركن السيارات في المولات والأماكن المشهورة التي لا يتوقع أحد أن يتعرض فيها لتلك المواقف، خاصة مع التردد المستمر وبناء ثقة في العاملين فيه.

سيدة تروي تفاصيل تعرضها لحيلة نصب جديدة تستهدف جراجات المولات والأماكن الشهيرة

وروت شيماء تفاصيل الموقف الذي تعرضت له، فبدأت منشورها بقول: عايزة أحكي لكم عن موقف حصل لي، وأتمنى الكل ياخد باله وما يقعش في نفس الفخ اللي وقعت فيه.

وأضافت: كنت في مول مشهور جدًا في التجمع الخامس، عندي معاد مع أصحابي، فلما وصلت، زي كل مرة، سلمت عربيتي للفاليه -الموظف المسؤول عن ركن السيارات في الأماكن المخصصة لها- وأخدت بطاقة الاستلام، المكان مليان عربيات فخمة وكاميرات في كل مكان، عمري ما تخيلت إن ممكن يحصل حاجة غلط.

وأشارت شيماء إلى أنه بعد دقيقتين، جاء لها شخص ادعى أنه من العاملين، وطلب منها بكل احترام تبديل البطاقات لأنها أخذت البطاقة الخاطئة، قائلة: جالي واحد من الفاليه وقال لي بكل احترام آسفين جدًا، حصل لخبطة، دي مش بطاقتك، ودي بطاقتك الصح، بمنتهى التلقائية، خدت البطاقة الجديدة من غير ما أشك لحظة، لأن المكان ده مش غريب عليا، وأنا متعودة أجي وأتعامل مع نفس الخدمة دي.

واستطردت شيماء حديثها قائلة: عدت ساعة مع أصحابي، وبعدها قررت أجيب من عربيتي حاجة وروحت بكل هدوء، أديت البطاقة اللي معايا للشخص المسؤول، وهنا بقى بدأت الكارثة، الموظف قعد يبص في البطاقة، وبعدها رفع عينه لي وقال لي البطاقة دي مش بتاعتنا. 

وأضافت: جريت على أصحابي في المطعم، وقلت لهم اللي حصل، كلهم اتصدموا، وهنا بقى اتضح إن النصاب اللي خد البطاقة الأصلية مني، اتصل برقم التليفون اللي مكتوب عليها، وطلب منهم يجهزوا العربية، راح استلمها كأنها عربيته ومشي بكل هدوء، بمنتهى السهولة والبساطة.

واختتمت: مع الجهود الجبارة لرجال مباحث التجمع الأول، تم القبض على الشخص ده في أقل من 24 ساعة، أنا بحكيلكم الموقف ده علشان تتعلموا منه تاخدوا بالكم كويس جدًا عند التعامل مع خدمات الفاليه، أي حد ممكن يتعرض للموقف ده، الأماكن دي مليانة ناس كتير، وأنت ممكن تفتكر إنك في أمان، لكن الحقيقة غير كده.