الفيديو متفبرك.. ابن عم المتهم بإلقاء زوجته من الطابق السابع في الأردن: رمت نفسها لوحدها
تصدر اسم آية عادل تريند مواقع التواصل الاجتماعي خلال الساعات القليلة الماضية، بعد أن تداول مستخدمو مواقع التواصل الاجتماعي، منشورات حول وفاة آية عادل صالح، مصرية مقيمة في الأردن مع زوجها، والذي يعمل بإحدى المؤسسات الحقوقية.
وقال أحد أفراد أسرة كريم خالد زوج الضحية آية عادل في تصريحات خاصة لـ القاهرة 24: متوقعش كريم يعمل كده لأني أعرفه من زمان، وهو راجل صعيدي وأصيل والصعايدة ميعملوش كده خالص في أهل بيتهم ودي حقيقة شوفتها.
ابن عم كريم يكشف كواليس عن حياته
وأضاف: كريم مستحيل يعمل كده وكل اللي اتقال ده إشاعات، وحسبي الله ونعم الوكيل مراته اللي رمت نفسها من الشباك، والفيديو متفبرك والكلام اللي اتقال مش مظبوط خالص.
وتابع: دكتور كريم ولا أخلاقة ولا تربيته تسمحله يعمل كده ولو هو مش عاوز مراته كان هينفصل عنها في هدوء ومش هيقتلها، واللي حصل قضاء وقدر وكل اللي اتقال من عيلتها كدب في كدب، وحسبي الله ونعم الوكيل ربنا مطلع والحقيقة هتظهر إن شاء الله.
وأردف: أنا اتعودت عليه إنسان متعلم ومثقف من سنين السنين وميقتلش أبدًا، لأن القتل بعيد عنه تمامًا، وعلى كل حال الله أعلم بالحقيقة فين أنا بتكلم من واقع اللي شوفته منه ومعرفش هو ازاي ممكن يعمل كده، بصراحة مش متخيل لأنه إنسان محترم جدًا والكل يشهد له، ومراته ماتت وخدت سرها معاها.
