أبرز تصريحات حسام حبيب مع بسمة وهبة: شيرين هي اللي طلبت الطلاق.. وبالنسبالي مرحلة وعدت
حل الفنان حسام حبيب ضيفًا على الإعلامية بسمة وهبة، في برنامج العرافة، وخلال اللقاء تحدث عن العديد من أسرار حياته وعلاقته بالفنانة شيرين عبد الوهاب.
وقال حسام حبيب عن إمكانية رجوعه لـ شيرين عبد الوهاب: مرحلتي مع شيرين انتهت ولن أعود مرة أخرى وعلاقتي بيها دمرتني ودمرت أهلي، وكنا أصدقاء قبل جوازنا وعمر ما حصلنا مشاكل وأول جوازنا كان جميل.. ولكن هي دلوقتي بالنسبالي مرحلة وعدت والناس مستكترة المرحلة تعدي عليا وأنا مكنتش عاوز أرد حفاظًا على العشرة وكنت مصمم لآخر نفس أحافظ عليها.
وأضاف حبيب: الناس لو ضحكت بيقولوا مستهتر وأنا مش فاهم إيه المطلوب مني، وديمًا بيطلع كلام أن حسام سرق من شيرين والحاجات دي ومطلعتش أدافع عن نفسي أملًا أن اللي طلعها يطلع يدافع عن نفسه ومرات أخويا قالتلي أنت أناني إحنا فين أنت دمرت نفسك.
وعن حلاقة شيرين عبد الوهاب لشعرها، قال حسام حبيب: شيرين هي اللي حلقت شعرها لنفسها وكان فيه دكتور بينظم علاقتنا وقالي لما تلاقيها متعصبة سيبها تهدى واتعصبت في يوم فأنا سيبت ليها الغرفة ونمت.. صحيت ملقيتهاش في البيت لحد ما هي كلمتني قالتلي هي فين روحت ليها وواحدة صحبتها قالتلي في حد بيسخنها عليك، وبعدها شيرين قالتي سمعني الأغاني بتاعك لما سمعت عيطت وقالتلي بتعمل لنفسك أغاني أحسن من اللي بتعملهالي.. وفي اليوم اللي شيرين حلقت فيه شعرها قالتي عاوزة أطلق قولتلها بس أهدي ردت قالتلي تبقى مش راجل لو مطلقتنيش قدام صحبتها، وكنا بليل قولتلها قومي ألبسي، ردت قالتلي أنا شيرين عبد الوهاب مبنزلش، قولتلها لا ده فوق على المسرح وإحنا هننزل نطلق.. صحبتها هدتني وقعدت وفجأة شيرين خرجت من الغرفة وهي حالقة شعرها وأنا اتخضيت.
وأكمل حسام حبيب: مكسبتش من القصة دي غير أذى ليا ومطلعتش للناس أدافع عن نفسي بس كفاية كده.
وواصل حسام حبيب: كل خناقة بينا كان فيها ناس وأماكن وأنا هستعين بالناس دي عشان أنهي القصة، وبعتذر لكل الناس اللي حواليا لأني أذتهم.
حسام حبيب: شيرين جبتلي المرض
وأردف حسام حبيب: شيرين جبتلي مرض الفقد وعملت ليها ديل برقم حلو وكان فيه شهود وقعدت وحطت رجل على رجل وقالتلي ولا ديل ولا بتاع، وقبل 2018 شيرين كانت لا تمتلك ألبومات وألبوم نساي كانت بتقولي خلتني أغني شبهك وهو اللي عملها فلوس وشهره وده شغلي اللي كانت بتتريق عليه، ومشفتش منها غير أذى، ولما سألتها ليه قالتلي عشان بحبك.. وهي جبتلي مرض اضطراب الفقد.
