أحمد السعدني: لام شمسية أصعب عمل في حياتي.. وأعتبر علي البيلي نجم رمضان
تحدث الفنان أحمد السعدني، خلال تصريحات تلفزيونية عن مشاركته في مسلسل لام شمسية، الذي يجمعه لأول مرة مع الفنانة أمينة خليل، ويعرض حاليًا في السباق الرمضاني 2025، وحقق نجاحًا كبيرًا منذ عرض أولى حلقاته.
أبرز تصريحات أحمد السعدني عن مسلسل لام شمسية
- أول مرة اتفرج على لام شمسية كان وقت عرضه، وبعد ما الحلقة الأولى خلصت كلمت المخرج كريم الشناوي وقولتله العمل ده عظيم، وبتابع ردود الفعل وبقرأ كل حاجة.
- شخصية طارق هي الغالبية العظمى من الرجال في الوطن العربي كله مش مصر بس.
- لما شفت مشهد لما طارق عرف أن ابنه اتعرض للتحرش معرفش أنا عملته إزاي، والتوفيق من عند ربنا، وهو كان مشهد صعب جدًا الحقيقة.
- أنا وأمينة خليل عندنا إفيه أن اللي معندوش مشهد صعب ولا فيه عياط في مسلسل لام شمسية يبارك للتاني، مفيش حد بيضحك في المسلسل.
- دوري في لام شمسية أصعب دور عملته في حياتي، أنا عملت أدوار كتير صعبة ولكن ده أصعبهم.
- علي البيلي أنا بعتبره نجم رمضان الأول، وهو رائع مش بس فنيًا وإنسانيًا كمان، هو إنسان واعي وفاهم ربنا يحميه.
- ابني عبد الله اتكلمت معاه عن فترة البلوغ لما ابتدى يبقى شاب أو مراهق، واتكلمت معاه في كل حاجة خاصة بالمرحلة اللي هو داخل عليها، وعمري ما تخيلت أني هعمل حاجة زي كده.
- ابني الصغير اتفرج معايا على أول حلقة، وكنت حريص إن ياسين يشوف أول حلقة معايا، وفي المشهد الأخير قال يا بابا إنت بتعمل إيه؟، قعدت فهمته وبدل قعدة مخصوص زي قعدة عبد الله قلت له كل حاجة وإحنا بنتفرج على المسلسل، ودي قيمة الفن، إنه يسهل توصيل المعلومة بشكل كبير.
- ياسين حضر معايا التصوير يوم، وطلع معايا في مشهد، طلع قاعد جنبي.
