كارولين عزمي عن انتقادات ملابسها في فهد البطل: البنات الشعبي أحلى بنات ومش مبهدلين.. ومحستش إني بعدت عنهم
علقت الفنانة كارولين عزمي، على انتقادات ملابسها وتصفيفها لـ شعرها خلال أحداث مسلسل فهد البطل، بطولة الفنان أحمد العوضي، الذي يعرض حاليًا في السباق الرمضاني 2025، وحقق نجاحًا كبيرًا منذ بداية عرضه.
وقالت كارولين عزمي، في ندوتها بالقاهرة 24: البنات الشعبي أحلى بنات وبيبقوا مهتمين بنفسهم جدًا ومش مبهدلين زي الأفكار اللي بتجيلنا، لما شفت بنات بـ عبايات هما زي القمر، وأنا قربت جدًا من البنت الشعبية وكنت لابسة عبايات واسعة طول الوقت.
وتابعت كارولين عزمي: الناس انتقدت إن راوية بتعمل شعرها مع أنهم المفروض مش معاهم فلوس، قبل ما فهد يتسجن راوية كانت بشعرها الطبيعي، وبعدين اشتغلت في البار وبقى معاها فلوس، وقصدت أعمل اختلاف بين الشكلين، وراوية مكنتش محجبة ومحستش أني بعيد عن البنات الشعبية اللي شفتهم على الطبيعة.
كارولين عزمي ترد على شائعة ارتباطها
كما ردت كارولين عزمي، على شائعة ارتباطها، قائلة: أنا مش متجوزة ولا عمري اتجوزت قبل كده، وفي ناس قالت دي معاها عيلين، وأنا كنت مخطوبة والخطوبة كانت فترة صغيرة ومحصلش نصيب، ولكن عشان لبست وقتها أبيض الناس ربطت ده بالزواج.
أما عن مواصفات الرجل الذي تود الارتباط به، فعلقت: مواصفات الراجل اللي أحب أرتبط بيه إنه يبقى راجل من أصل طيب، وبيراعي ربنا فيا وفيه وفي كل اللي حواليه ويكون بار بأهلي ويتقي ربنا، وده أهم حاجة وأنه يكون بيضحكّني.
