ضرب ابني ووقّعه.. سيدة تستغيث من اعتداء مدرس على صغيرها: كل الأمهات بالمدرسة اشتكوا منه
استغاثت سيدة تُدعى شيماء سعيد، من تعرض صغيرها للضرب من قبل مدرس بإحدى المدارس التجريبية بـ منطقة السيدة زينب، زاعمة أن المدرس على نجلها حسام 7 سنوات، خلال حصة مدرسية، وتسبب له في إصابات جسدية ونفسية له.
سيدة تستغيث من اعتداء مدرس على طفلها
وقالت شيماء في تصريحات خاصة لـ القاهرة 24: ابني كان عنده يوم للتقييمات في 3 مواد، وطبعًا كان لازم يحضر كل ده واتفاجأت بعد ما خرج من المدرسة وروحنا إن فيه حفرة في دماغه، ولما سألته ايه ده؟ الولد خايف يتكلم معايا وقالي متزعقليش ياماما ومتضربنيش وهقولك، لقيته خايف من المستر جدًا.
وتابعت: عرفت منه إن المدرس ضربه وشده جامد من شعره، ووقعه على الديسك وشتمه قدام زمايلي، المستر شد شعر الولد لدرجة إنه طلع في إيده، كل ده عشان حاجة تافهه إنه عاوز يروح الحمام، ضربه وهزقه وشده جامد، ولحد دلوقتي مش مستوعبة اللي حصل لابني، ونفسيته زي الزفت من اللي شافه.
وأضافت: وطبعًا روحت المدرسة قدمت شكوى في المدرس ده، وعارفة المدرسة مش هتعمل حاجة لأن المدرس ده جت منه شكاوى كتيير جدًا من أولياء الأمور، وأسلوبه مش حلو مع الأطفال وبيعاملهم وحش جدًا، ومش بيحصل حاجة كل الشكاوى بتتحط في الدرج، وأنا قدمت بس شكوى عشان أكون عملت اللي عليا، وبلغت مدير المدرسة.
واختتمت: حق ابني أنا مش هسكت عليه وقدمت شكوى في الإدارة باللي حصل، لأني مش مستوعبه ليه يحصل كده مع طفل؟!
