تصدر التريند.. أول تعليق من صانع المحتوى محمد عبد العاطي بعد حلقة سوزي الأردنية| خاص
تزامنًا مع تصدر حلقة البلوجر سوزي الأردنية تريند مواقع التواصل الاجتماعي من برنامج مع كامل احترامي الذي يقدمه صانع المحتوى محمد عبد العاطي، جاء أول تعليق منه مُعبرا عن إعجابه الشديد بـ ردود أفعال متابعي السوشيال ميديا على الحلقة.
محمد عبد العاطي: كنت متوقع نجاح حلقة سوزي الأردنية
وقال محمد عبد العاطي في تصريحات خاصة لـ القاهرة 24: الحمد لله على نجاح الحلقة، عندنا فريق عمل كويس قدر يحقق النجاح ده، فشكرا ليهم وشكرا لسوزي.
وأضاف: كنت متوقع أنها تبقى حلقة حلوة ومختلفة، ومكنتش ناوي أتكلم مع سوزي في الحاجات العادية لأنها دمها خفيف، الناس دي دمها خفيف ونظرتي فيها طلعت صح الحمد لله.
عبد العاطي: أنا بقدم محتوى ترفيهي ولازم أكون متواضع
وتابع عبد العاطي: سوزي الأردنية حتى لو كنت مخطط إنها متطلعش بالعفوية دي، مكنتش أعرف إنها بنت لذيذة جدا وغلبانة وجدعة وعفوية اوي في التعامل، هي مبسوطة أوي بالحلقة ونجاحها.
وأوضح عبد العاطي رأيه تجاه المتابعين الذين عبروا عن تواضعه مع سوزي خلال الحوار بينهما في منشورات السوشيال ميديا، قائلا: مفيش أي مبرر أو دافع يخليني مش متواضع مع أي ضيف يجيلي البرنامج أو أي حد، أنا شخص بقدم محتوى على الإنترنت ولازم أكون متواضع مع كل الناس.
عبد العاطي: الحلقة فرقت معايا نفسيًا
وأكد: مافيش مقارنة بيني وبين أي حد من المذيعين المشاهير، أنا مجرد شخص بقدملك ساعة في أسبوعك بغرض التسلية والترفيه، مش غرضي الإفادة.. أنت لو قدامك أراجوز بيلعب ببلونة مش هيعلمك لكن ممكن يسليك أو يضحكك، وده هدفي إنك تقتنع بيا كشخص بيضحكك.
واختتم عبد العاطي: الحلقة فرقت معايا نفسيًا وفرقت مع سوزي الأردنية بإن الناس بدأت تبصلها بنظرة مختلفة، وده من أهم أهداف الحلقة بتاعتي، وده اللي وعدتها بيه قبل ما تيجي، مبسوط إن الحلقة عجبت الناس وسوزي تستاهل لأنها بـ روح طفلة وغلبانة وعلى طبيعتها.
