رجعت بعد 35 سنة من ليبيا لقيت نفسي ميت.. عامل بالمنوفية يتهم نجله باستخراج شهادة وفاة له
أنا ميت على الورق وعايش في الحقيقة، بهذه الكلمات بدأ عامل يدعى عبد الفتاح علي المغربي، 60 عامًا، ابن قرية طنبدي التابعة لمركز شبين الكوم بمحافظة المنوفية، حديثه عن معاناة استمرت بعد عودته من الغربة التي قضاها في ليبيا على مدار 35 سنة، ليكتشف أنه ميت رسميًا بشهادة موثقة.
حكاية عبد الفتاح واتهامه لابنه في المنوفية
يقول عبد الفتاح لـ القاهرة 24: كنت متزوج وعندي ولد وبنت، وبعد مشاكل بيني وبين أهل مراتي طردوني من البيت، قعدت سنة كاملة أنام في النعش بتاع الجامع في قريتي من البرد، لحد ما حد قالي سافر ليبيا، وسافرت فعلًا وقتها كانت السفرية بالبطاقة.
عبد الفتاح من المنوفية: أسرتي طلعولي شهادة وفاة وأنا حي
ويضيف: اشتغلت في ليبيا ومكنتش ناوي أرجع، لكن أخويا كلمني وقالي أمك وأبوك ماتوا ولازم تنزل، ونزلت من سنتين ونص، وهو اللي استقبلني على الحدود بشهادة الميلاد، لكن لما وصلت لقيت نفسي متوفي رسميًا، وده علشان قضية الورث اللي ولادي واخواتي البنات رفعوها، ولما القضية وقعت قالولي ما نعرفكش.
يتابع: دلوقتي عاوز أعمل بطاقة رقم قومي علشان أعيش، بس ابني هو اللي لازم يشهد، وهو رافض غير لما ياخد 100 ألف جنيه، وأنا حتى لو شوفته مش هعرفه، لهجته ليبي ومش بيتكلم مصري، وأنا أساسًا معرفش عنه حاجة من سنين.. متابعا: أنا متجوز في ليبيا وعندي أولاد، وعاوز أشتغل وأسافر وأعمل عملية في رجلي، بس كل ده مش قادر أعمله علشان معنديش بطاقة، كل اللي طالبه حد يساعدني أرجع أعيش من تاني بعد ما دفنوني على الورق وأنا حي.
