رسالة مؤثرة من ميدو لـ شيكابالا: إنسان قبل ما يكون لاعب كرة
ودع أحمد حسام ميدو نجم الزمالك السابق، محمود عبدالرازق شيكابالا، وذلك بعد اعتزال الأخير لعب كرة القدم بشكل نهائي.
رسالة ميدو لـ شيكابالا
وقال أحمد حسام ميدو عبر حسابه الرسمي على موقع التواصل الاجتماعي إنستجرام: شيكابالا مش زي أي لاعب عادي لأنه ببساطة كان إنسان قبل ما يكون لاعب كرة، ربنا أنعم عليه بالموهبة الفطرية، ومعاها قلب طيب زي معظم أهلنا في أسوان.
وأكمل: محمود عبد الرازق أعرفه كويس جدا صاحب جدع وراجل من صغره، ولما اتزاملت معاه في الملعب كان قيمة فنية نادر أنك تقابلها في الملاعب المصرية، ولما دربته سواء في الزمالك أو الإسماعيلي، كان لاعب فذ يقدر يقلب أي ماتش.
وأضاف ميدو: شيكابالا أتولد في مدرجات حلمي زامورا، وأتولى وعاش جوة نادي الزمالك واختار أنه يكون أسطورة، على مدار 30 سنة لعب كورة في قطاع الناشئين والفريق الأول، وكما طريقه لحد ما أصبح كابتن تاريخي لنادي الزمالك.
وواصل: موهبة شيكابالا كانت تؤهله يلعب في أكبر أندية العالم، لكن حتى لما في بعض الأوقات الحظ مكنش بيقف معاه والظروف تعانده، كان بيرجع لبيته الزمالك عشان يكمل معاه رحلته ويفضل هو روح الزمالك.
وزاد: في أوقات كتير كان الفريق مش في أحسن حالاته بس شيكابالا شايل الزمالك على كتفه، وحتى لما جة لاعيبة كويسة في وقت تاني، كان شيكابالا موجود كابتن بروح ميت عقبة بيدلهم على طريق البطولات ومنصات التتويج.
وأضاف: ودلوقتي بعد ما قرر يعلق حذاءه، ويحرمنا من متعة الفرجة على سحره في الملعب، مكانه الطبيعي الرجوع لمدرج التالتة يمين، ويتكتب أسمه بحروف من نور وسط أساطير الزمالك الكبار.
وأتم: رحلتك دلوقتي كادر مميز للزمالك والبداية بردوا من المدرج زي ما بدأت من 30 سنة يا ساحر.
