الإعلامية سهير شلبي: نسيت نفسي في مشوار الحياة وحاسة بالوحدة.. ومعنديش شقة ملك باسمي
أعربت الإعلامية سهير شلبي، عن حزنها بسبب عدم امتلاكها منزلًا خاص بها، موضحة أنها قدمت الدعم والمساعدة لكل من طلب منها على مدار مشوار حياتها ولكنها لم تتذكر حالها إلا من فترة قريبة متسائلة: أنتي كنتي فين يا سهير ونسيتي نفسك؟، بجانب كشفها سر نجاحها في مشوارها الإذاعي.
وقالت سهير شلبي، في تصريحات إذاعية: مكنتش بندم على حاجة في حياتي لأني كنت واثقة من خطواتي وبعمل اللي يرضيني كـ ضمير وإعلاميًا، ولكن اكتشفت مؤخرًا أني خدمت كل الناس وجبت لكل الناس اللي هما عايزينه ما عدا أنا، نسيت نفسي في مشوار الحياة، ساعات بحس رغم كل العالم اللي حواليا أني وحيدة بالرغم من صدقاتي.
وتابعت سهير شلبي: أنا مجبتش بيت ليا ولا عملت حياة خاصة بيا، الله هو أنتي يا سهير كنتي فين؟، أنا معنديش بيت تمليك، بقيت أقول أنا ليه نسيت نفسي كده، والحمد لله كل اللي بتمناه من ربنا الصحة والستر وربنا يخلي ليا ولادي.
سهير شلبي: أنا حاورت عظماء مصر.. وكنت بعد برامجي بنفسي
أما عن سبب نجاحها في مشوارها الإذاعي، علقت سهير شلبي: كرسي المذيع بيبقى جاي ومحضر وعارف هيسأل في إيه، وأنا كنت بذاكر الضيف اللي قدامي بشكل مش طبيعي وكنت بقرأ الكتب بتاعته وكنت بجيب المعلومات من أرشيف الجرنال، أنا قدرت أحاور كبار وعظماء مصر من كتاب وشعراء وفنانين وملحنين وأطباء، ثروة مصر الحقيقية الإنسان المصري ذو القيمة، أنا عمري ما كان معايا مٌعد أنا اللي كنت بعد برامجي طول الوقت، كنت بحب أبقى واثقة من المعلومة وبحب أجتهد.
