أحمد السقا: مفيش حاجة اسمها صراع الأجيال.. وفيلم إبراهيم الأبيض محدش هيعرف يعمله تاني
تحدث الفنان أحمد السقا، عن فكرة صراع الأجيال مؤكدًا فضل الفنان محمد هنيدي، على جيله بالكامل، بجانب الحديث عن فيلم إبراهيم الأبيض.
وقال أحمد السقا، في تصريحات تلفزيونية: مفيش حاجة اسمها صراع الأجيال دي أرزاق، الميديا لازم تعمل صراع علشان يلاقوا حاجة يعملوها، يعني ابني شغال في الميديا هصارع ابني؟، أحمد غزي ده أنا اللي مربيه وأبوه صاحبي هصارع ابن أخويا؟، هصارع مين؟.
وتابع أحمد السقا: لو اتكلمنا على الجيل بتاعنا بدأنا صغيرين أوي، والناس بتعاملنا على إننا موجودين مش كبار في السن، يعني لولا وجود محمد هنيدي مكنش في ولا واحد فينا موجود.
أحمد السقا: إبراهيم الأبيض فيلم استثنائي
كما تحدث أحمد السقا، عن فيلمه الشهير إبراهيم الأبيض، قائلًا: مش هعرف ألعب فيلم إبراهيم الأبيض تاني ولا مروان حامد هيعرف يخرجه تاني ولا عباس أبو الحسن هيعرف يكتبه تاني ولا في شركة هتعرف تنتجه، الفيلم ده استثنائي.
أما عن رأيه في فكرة التريند، فعلق أحمد السقا: التريند مستحدث وهيروح، ولو ابني قالي مش عايز يكون نسخة مني هتبسط وأتمنى أنه يبقى أحسن مني.
آخر أعمال أحمد السقا
وعلى جانب آخر، يعرض حاليًا للفنان أحمد السقا، فيلم أحمد وأحمد في دور العرض السينمائي، والعمل من بطولة الفنان أحمد السقا وأحمد فهمي، الفنانة غادة عبد الرازق، جيهان الشماشرجي، رشدي الشامي، إلى جانب عدد من ضيوف الشرف مثل طارق لطفي وأوس أوس، وغيرهم من النجوم.
