شادي رضوان: الأهلي مضاني على بياض بعد مفاوضات الزمالك.. ورفض عرض لشبونة
قال شادي رضوان لاعب النادي الأهلي السابق، إنه حصل على مستحقاته المتأخرة من مسؤولي الأحمر بعد علمهم بمفاوضات نادي الزمالك معه، ورفض القلعة الحمراء عرض فريق سبورتينج لشبونة البرتغالي.
تصريحات شادي رضوان
وقال شادي رضوان، في تصريحات إذاعية: وقت ما كنت بعمل التأهيل بعد إصابة الصليبي، وكيلي رشحني للمسؤولين في نادي الزمالك والناس كانت مرحبة، وانا مكنتش أعرف حاجه، والموضوع طلع في الإعلام.
وأضاف: بعد تسريب الخبر بيومين الإداري اللي كنت بكلمه يشوفلي النادي عشان الفلوس، ويقولي استني شويه وكده، كلمني قالي انت مبتجيش تاخد فلوسك ليه، بكره تيجي تاخد الشيك بتاعك جاهز، بعد سنه كاملة مش باخد جنيه ولا عارف اتمرن في التتش وبصرف على نفسي في التأهيل.
وتابع: رحت النادي ومضوني عقد على بياض، محدش قعد معايا وقتها لا أمير توفيق ولا خالد بيبو ومضيت على طول، اتبلغت إن الراجل هيشوفني معاه يأما يقول اه أو اطلع إعارة أو أمشي خالص، فترة الإعداد بدأت محدش كلمني، دخلت في سكة شهر محدش بيديني رد مفيد، والوقت ده كان في ناس بتطلع إعارات، كلمت أمير توفيق وقالي تبدء تتحرك دلوقتي وكلم سامي قمصان عشان تفهم ايه الدنيا، انا مضيت على بياض وبعد كده محدش سمع عني.
واختتم رضوان تصريحاته: في وقت من الاوقات جالي من العين الإماراتي عرض بفاكس رسمي قيمته 150 دولار، والنادي رفض وقتها وقالهم دي قيمة الإعارة موسم واحد وانا كنت ناشئ 16 سنه، وبعدها جالي سبورتينج لشبونه مرتين واتعمل وثيقه تأمين عليا بطلب من الأهلي جوه الملعب وكان مطلوب يتعمل بره الملعب كمان بس هما بره استغربوا عشان مفيش كده بيحصل.
