لونك بعد الغياب

عندي قناعة تامة بنسبة 100% إن الإنسان هو اللي بإيده يحدد إنطباع الناس عنه هيكون إزاي سواء أثناء حياته أو بعد وفاته.. الأفعال الصادرة منك كفيلة تنقل صورة كاملة عنك لكل اللي حواليك وبالتالي بيتحدد من خلال الناس هما هيعاملوك إزاي.. صحيح إن فيه ناس كده كده هيتكلموا عنك بشكل مسيء حتى لو كنت ملاك بجناحين بس المعظم بيأثر فيهم تعاملك معاهم وبيتولد من خلاله تعاملهم معاك.. يمكن عشان كده قالوا إن السيرة أطول من العمر، ويمكن عشان كده برضه بيتقال إن عُمر الإنسان مش بيتحسب بعدد السنين اللي عاشها لكن بالأثر اللي سابه من بعده.

 الداعية القديرة د."عبلة الكحلاوي" الله يرحمها كانت سيدة بشوشة ومحترمة، ومن الناس اللي كانوا بيوصلوا المعلومة بسلاسة ويسر ووشها فيه راحة غريبة تجبرك إنك تحبها.. د."عبلة" أنشأت أول دار لرعاية مرضى "الزهايمر" كبار السن، وأعمال الخير اللي كانت بتعملها ويعرفوها القريبين منها كانت بدون حدود.. عمرها ما ردت حد قصدها.. عشرات القصص اللي كنت بسمعها عنها بشكل شِبه أسبوعي من الجيران أو الأصدقاء خصوصًا زمان أثناء فترة إقامتي في منطقة 6 أكتوبر كانت مخلية امتناني ومحبتي للسيدة دي فوق الوصف حتى بدون ما أشوفها وجهًا لوجه!.. إنسانة وهبت نفسها لله ولخدمة عباد الله!.. عشان كده من 8 سنين فاتوا ولما فيه صديقة أردنية -(مش مسلمة)- اتصلت بيا عشان كانت عايزة تكمل تعليمها الجامعي بس بسبب ظروف خاصة عندهم في البيت حلمها كان مهدد بالتوقف لأسباب مادية حبت تسألني عن حل.. 

الحقيقة إن الموضوع كان صعب عليا بسبب الرقم الكبير اللي كان مطلوب، والحقيقة إنه كان هيبق صعب على أي حد غيري كمان!.. قولتلها للأسف مفيش في إيدي حاجة لكن ممكن أوصلك بـ رقم د."عبلة الكحلاوي" وأعتقد إنها ممكن تقدر تساعد!.. مش عارف إيه اللي خلاني أعمل كده خصوصًا إني مش عارف الدكتورة الله يرحمها بشكل شخصي بس غالبًا اللي حركني للتصرف ده كان سمعتها الطيبة اللي كانت ولازالت عالقة في عقلي.. إديتلها الرقم وأنا متأكد بيني وبين نفسي إنها أكيد هتعتذر لها ده لو ردت أساسًا لإن الناس المحتاجة هنا في مصر أكتر، وكمان عشان ما يبقاش فيه باب قدامنا وما خبطناش عليه..

بعدها بـ 8 شهور تقريبًا صديقتي كلمتني وقالتلي إنها عدت التيرم الجديد من الجامعة بعد ما رجعت لها!.. والسبب؟.. بعد ربنا سبحانه وتعالى د."عبلة" اللي تكفلت بكل حاجة!.. أيوا ده اللي حصل!.. اتضح ليا بشكل ما وبدون ذِكر تفاصيل مستأذنتش أصحابها إن صديقتي وصلت لـ د."عبلة" الله يرحمها بالفعل وعرضت عليها مشكلتها والدكتورة تكفلت بكل مصاريف دراستها بالكامل.. لا قالت دي مش مصرية، ولا صدتها لإنها مش مسلمة.. لأ.. اتعاملت معاها بإنسانية نبيلة ونقية بتأكد إنها كانت سيدة ملائكية الُخلق.. ربنا يرحمها ويغفرلها ويرزقها الجنة.

• زي ما فيه ناس يتفات لها بلاد، وناس يتراح لها بلاد كمان فيه في ناس بتمشي وتسيب وراها ريحة خير وسيرة طيبة تعيش بعدهم سنين، وناس تانية للأسف بتسيب وراها غبار تقيل ومواقف توجع كل ما حد يفتكرها ويفتكرهم.. الفرق مش في طول العمر، ولا في عدد السنين اللي هتعيشهم، لكن في البصمة اللي هتسيبها في قلوب الناس.. الحياة قصيرة مهما طالت، والسيرة أطول من العمر.. إزرع حلو فين ما تروح.. الأثر الحلو بيخلّي حضورك ممتد حتى وأنت غايب، والأثر الوحش بيخلي غيابك أرحم من وجودك.