معتز إينو: عملت محضر إثبات حالة لـ الزمالك في القسم بخطة من الأهلي
كشف معتز إينو نجم النادي الأهلي كواليس رحيله عن نادي الزمالك والانتقال إلى القلعة الحمراء، وهي الرحلة التي وصلت إلى اللجوء إلى قسم الشرطة.
تصريحات معتز إينو
وقال معتز إينو الذي حل ضيفا على الإعلامي عمر ربيع ياسين ببرنامجه مان تو مان: الزمالك لما شعر إني وقعت للأهلي بقى يخليني آجي التمرين خمسة الصبح.
وأضاف معتز إينو: كنت ملتزم بردو وبروح الفجر وفجأة لقيتهم بيقولوا ده مش بيجي فروحت عملت محضر إثبات حالة في قسم العجوزة.. والأهلي اللي كان قايلي أعمل كده.
وأكمل معتز إينو: لما إتاكدوا بقى إني وقعت للأهلي سفروني معاهم ونزلوني لعبت آخر دقيقة في ماتش إفريقي عشان مشاركش مع الأهلي في إفريقيا.
كما كشف معتز إينو نجم الأهلي الأسبق، كواليس رحيله عن الزمالك وانتقاله للأهلي، بعد تجاهل مسئولي الزمالك تجديد عقده.
وقال إينو: بص أنا قبلها بفترة كنت بلعب كويس ومنتخب مصر لكن في نادي الزمالك كان يقولك ابن النادي أو الولد الصغير مش دلوقتي، دائما اللي جاي من بره هو المرغوب وييجوا على اللاعب الصغير.
وتابع إينو: كنت مكسر الدنيا وبجيب أجوان.. قولتلهم يا جماعة عاوز أجدد ومحدش سأل فيا، وقبل ما أروح الأهلي السنة دي كنت بجيب أجوان وأنا اللي بخلص المباريات، يا جماعة عاوز أجدد وأنا اللي بلعب وبروح المنتخب وكنت باخد 50 أو 60 ألف جنيه حاجة كدة وكل الصفقات اللي جاية من بره مش بتلعب وبتاخد أرقام.
وأوضح نجم الأهلي السابق: كنت لسه صغير وخاطب وعاوز أجهز نفسي وأظبط دنيتي لكن محدش بيسأل فيا، في مرة المستشار مرتضى منصور قالي تعالى الساعة 12 رحت أنا وأبويا الساعة 12 الظهر وأتاري أنها 12 بالليل، وفضلت قاعد ومروحتش ومستني في المكتب وبرضو مقابلتوش وحد طلع قالنا تعالوا وقت تاني، فالمواقف دي بتنهي أي حاجة.
وعن مفاوضات الأهلي، قال: لما النادي الأهلي أتدخل الموضوع اتغير خالص، كنت عاوز أروح أشوف الدنيا هناك وأكيد عقد مالي كبير ومانويل جوزيه اللي طلبني فالموضوع كان نقله تانية هتجيب اللي نفسك فيه، والنادي الأهلي نادي كبير وأي حد يتمنى يلعب فيه وكان مكتسح البطولات وفعلا الدنيا اتغيرت معايا.
