مصطفى قمر: معنديش مانع أعمل فيلرز لما وشي يعجز
أكد الفنان مصطفى قمر إن فرقة مسار إجباري خرجت من عباءته، كما وصف، وذلك لأن أعضائها أكدوا له في وقت سابق أن أغاني فرقتهم متأثرة بشكل كبير بأغانيه.
وقال مصطفى قمر خلال تصريحات تليفزيونية: فرقة مسار إجباري طالعين من عباءة مصطفى قمر.. وصيام الجيتاريست في الفرقة كان بيقعد على رجلي وبيتفرج عليا وأنا بلعب الجيتار زمان ودلوقتي بقى أستاذ، وهو قالي إحنا طلعنا من الأغاني بتاعتك وحد من فرقة كايروكي برضه قالي إنت مأثر فينا وفي فرقتنا ودي حاجة بتبسطني.
وأضاف مصطفى قمر: مفيش مانع إني لما أعجز شوية أو يحصل أي حاجة في وشي أو أحس بعدم نضارة عادي لو أخدت فيلرز، بس حتى الآن مش بعمل حاجة والموضوع جاي من ربنا.
مصطفى قمر: إحنا اللي بنصنع التريند
وأشار مصطفى قمر إلى أنه يصنع أغاني وفن يعيش لسنين بعده، وقال خلال تصريحات تليفزيونية: إحنا اللي بنصنع التريند وأنا لما بعمل تريند بيعيش، لما أعمل أغنية زي سكة العاشقين الناس هتقول بعدين كان في واحد جامد بيغني اسمه كذا، وولادي وأحفادي يفضلوا يتكلموا عني، غير ناس بتعمل أغنية بتعيش 3 شهور فقط.
مصطفى قمر يدعم أنغام
وفي سياق آخر، سبق ودعم مصطفى قمر أنغام في أزمتها الصحية، حيث كتب منشورا عبر حسابه بـ إنستجرام: ربنا يتمم شفاكي على خير يا أنغام يا رب، يلا شدي حيلك ترجعيلنا بألف سلامة وتفرحينا وتفرحي جمهورك، أدعو لها يا جماعة تقوم بالسلامة وشفاءً لا يغادر سقمًا بإذن الله.
