الخطيب لـ لاعبي الأهلي: احترموا الكيان.. الكرة مش أسماء بس
وجه الكابتن محمود الخطيب، رئيس مجلس إدارة النادي الأهلي، رسالة حاسمة للاعبي الفريق الأول لكرة القدم خلال مران اليوم، على ملعب مختار التتش، شدد خلالها على أهمية الالتزام بروح الأهلي، والعمل الجاد من أجل استعادة النتائج الإيجابية وإسعاد الجماهير.
الخطيب للاعبي الأهلي: احترموا الكيان.. الكرة مش أسماء بس
وأكد الخطيب في كلمته أن وليد صلاح الدين، مدير الكرة الجديد، هو المسؤول بشكل كامل عن كل ما يخص الفريق الأول، مشيرًا إلى أن الفترة المقبلة تتطلب تركيزًا والتزامًا أكبر من الجميع.
وقال الخطيب: الكرة مش أسماء.. الكرة جدعنة، ورجولة، واسبرنتات، واحتكاك. إحنا في استاد مختار التتش، اللي مر عليه أساطير النادي الأهلي لحد ما وصل ليكم النهارده، في ناس كتير أحسن مننا، لكن كله راح، والأهلي هو اللي باقي.
وأضاف: الأهلي هو اللي صنع الأسماء دي، ومينفعش أي حد يلعب باسم الأهلي أو بمجهود غيره. أنا مكنتش حابب الفترة اللي فاتت تكون بالشكل ده، لأن الأهلي كيان وتاريخ ومبادئ.
وتابع الخطيب حديثه بنبرة حاسمة: اتكلمت معاكم قبل كده، وواضح إنكم نسيتوا، وأنا مش هتكلم تاني. المطلوب منكم تحترموا الأهلي، الكيان والجمهور.
واختتم رئيس النادي حديثه مؤكدًا ثقته في الفريق: عندي ثقة كبيرة في كل لاعب فيكم. ننسى اللي فات ونفكر في اللي جاي، التركيز هو اللي هيحقق لنا اللي بنتمناه، واللي جمهورنا بيحلم بيه.
ويأتي حديث الخطيب في توقيت حساس، في ظل تراجع الأداء والنتائج خلال الفترة الماضية، وسط مساعٍ قوية من إدارة الكرة لإعادة الانضباط واستعادة هيبة الفريق.
