مدرب كهرباء الإسماعيلية لـ القاهرة 24: لسنا خائفين من الأهلي.. ونلعب على النتيجة لا الأداء
تحدث رضا شحاتة المدير الفني للفريق الأول لكرة القدم بنادي كهرباء الإسماعيلية، عن كواليس استعدادات الفريق للمواجهة المرتقبة أمام النادي الأهلي، في مسابقة الدوري الممتاز.
مدرب كهرباء الإسماعيلية لـ"القاهرة 24": لسنا خائفين من الأهلي.. ونلعب على النتيجة لا الأداء
وقال رضا شحاتة في تصريحات خاصة لـ القاهرة 24: مفيش مباراة هننزلها بنلعب على غير النتيجة، إحنا عاوزين نقدم صورة كويسة لكهرباء الإسماعيلية في أول ظهور أمام الأهلي.
وأضاف شحاتة: منقدرش نقول اللاعبين مخضوضين من مواجهة الأهلي قبل ما نبدأ المباراة، عندنا لعيبة واعدة وأيضا لعيبة خبرات، قادرين على تقديم أداء ونتيجة جيدة.
وتابع شحاتة: معنديش استقرار على لاعب واحد في الفريق، كل اللاعبين على مستوى واحد، علي الجابري حارس المرمى بدأ الدوري ومقدمش أفضل أداء، دخل اللي بعده محمد هجرس، وإحنا بنبدل ونشوف الأفضلية، إحنا معندناش حد أساسي وحد احتياطي.
وزاد شحاتة: البعض يرى مواجهة الأهلي محسومة؟.. كل واحد يشوف اللي هو عاوزه منقدرش نحجر على رأي حد، بنشتغل على الدوري كله من بدايته مش فريق بعينه، ومباراة الأهلي بـ 3 نقاط فقط مثل أي مباراة.
وأردف شحاتة: إحنا اتظلمنا تحكيميا في مباريات غير الأهلي، اتظلمت في ماتش سموحة رغم أنه مش الأهلي، الحكم زي اللاعب ممكن يبقى موفق في مباراة ومباراة أخرى لا يوفق.
واختتم رضا شحاتة تصريحاته قائلًا: استعدادات مواجهة الأهلي بتختلف عن أي فريق بالنسبة لي، في المباريات بناخد وقت في شحن اللعيبة معنويا وتحفيزهم، لكن أمام الأهلي والزمالك اللعيبة بشكل طبيعي بتبقى مشدودة ومركزة.
