عمرو سلامة: أوافق على انتقاد الأفلام.. لكن أرفض المطالبات بمنعها أو معاقبة صناعها
أعرب المخرج عمرو سلامة، عن استيائه بسبب منع عدد من الأعمال الفنية من العرض، مشيرًا إلى أنه يتفهم الانتقادات الموجّهة للأعمال، لكنه شدد في الوقت نفسه على رفضه التام لأي دعوات لمنع الأعمال الفنية أو معاقبة القائمين عليها.
عمرو سلامة: أوافق على انتقاد الأفلام.. لكن أرفض المطالبات بمنعها أو معاقبة صناعها
وكتب عمرو سلامة عبر حسابه بموقع التواصل الاجتماعي فيس بوك: موافق على الانتقادات لكن رافض تمامًا طلبات المنع والمعاقبة، طالما قدمت شغلك للجمهور زي ما أنت عايزه يدفع فلوس، وزي ما أنت مستني إعجاب، يبقى لازم تبقى مستعد تتحمّل النقد… مهما كان لاذع أو قاسي.
وتابع: لكن الناس اللي عايزة تمنع عمل، أو تعاقب صناعه علشان حاجة مش عاجباهم، أو علشان بيحاكموا العمل بأخلاقياتهم الشخصية دول في الحقيقة بيضرّوا نفسهم قبل أي حد، لأن بكرة لو طلع عمل بيعبر عنهم ويمثلهم، ممكن طرف تاني مختلف أو محافظ أكتر يشوف نفسه مهدد، فيطلب هو كمان منعه، وده معناه إن الفن يبقى ماسخ.
وأضاف: ما يناقشش حاجة حقيقية، ما يمثلش أي فئة، ولا يزعّل حد. يبقى مجرد حشو شاشات وسماعات، يعني يبقى المفروض العمل ياخد موافقة الشعب كله قبل ما يتعرض، ولو أكتر شخص متطرف فكريًا ماعجبوش، يتشال من الوجود، أنا فاهم وجهة نظر اللي شايف إن الشتيمة مش إنجاز ولا حرية ولا جرأة… بس دعمك للمنع بيفتح باب يتمنع من خلاله أي جرأة تانية، أي نقاش حقيقي، أي صرخة من مظلوم.
واستكمل: افتح أي فيلم محترم من التسعينات واسأل نفسك: هل الفيلم ده كان ممكن يتعمل النهاردة؟ بنسبة 90% لأ..قريب شفت الخماسية العظيمة لعادل إمام ووحيد حامد وشريف عرفة مع حفظ الألقاب.. وسألت نفسي: هل أي فيلم فيهم ممكن يتعمل النهاردة؟ أقولك؟ هل أي عشر دقايق في أي فيلم فيهم يتعملوا النهاردة؟
لو وافقت إن اللي واقف يمينك يتخرس.. يبقى اللي واقف شمالك من حقه يخرسك انت كمان.
واختتم: وفي الآخر، بحيي النقابة وبادعمها على سماحها لأي حاجة مختلفة… حتى لو مش على مزاجي ولا على مزاجها، وضد المنع أي منع، في زمن كل حاجة فيه متاحة، المنع بقى نكتة… منطق قديم، ديناصوري، وعطن.
