منتج السلم والثعبان2 ردًا على الانتقادات: الإيحاءات مش فجة والعمل مش مناسب للصغار
علق موسى عيسى، منتج فيلم السلم والثعبان 2 “لعب عيال”، على الانتقادات الموجهة للعمل، موضحًا أن العمل موجه لطبقة معينة والإيحاءات ليست فجة على حد قوله.
وقال منتج فيلم السلم والثعبان 2، في تصريحات تليفزيونية: فيه ناس مكنتش دخلت الفيلم وبتتكلم على السلبيات بناء على البرومو وآراء ناس تانية، وفيه ناس لما دخلت الفيلم طلعت اتكلمت كويس أوي عن الفيلم وقالوا قصة حب حلوة أوي واتبسطوا.
وتابع: التعليقات السلبية بتقول إن الفيلم فيه إيحاءات ومش مناسب للأطفال، وهو مش مناسب للأطفال بصراحة، واتكلموا على جرأة الفيلم، ومن الإيجابيات الناس حبت قصة الحب وأن ده فيلم مصري ومتصور كله في مصر.
وأضاف: من وجهة نظري أن الفيلم فيه شوية إيحاءات ولكن مش فجة أوي، وعلى حسب كل واحد عايز يفهمها إزاي، ولو الفيلم مش مبادئك أنت حر ومتدخلش، وأفلام زمان كان فيها أكتر من كده بكتير وكان في ممثل بيطلع بـ بدلة رقص
الفيلم فعلًا موجه لـ طبقة معينة من الناس بحكم شغلهم ولكن قصة الحب ممكن تتلعب في أي طبقة، والناس دي موجودة والبيوت دي حقيقة والعالم ده حقيقي، مش لازم دايمًا أعمل فيلم شعبي أو طبقة متوسطة، لأ الطبقة دي موجودة في مصر وبتخرج وبتتكلم كده.
فيلم السلم والثعبان
والسلم والثعبان 2، من بطولة بطولة عمرو يوسف، ويضم عدد كبير من النجوم، أبرزهم أسماء جلال، ظافر العابدين، ماجد المصري، حاتم صلاح، وفدوى عابد، مع ظهور خاص للفنانة سوسن بدر، وهو من تأليف أحمد حسني، وإنتاج طارق العريان وموسى عيسي ومحمد رشيدي وهشام عبد الخالق وإخراج طارق العريان.
