ملناش حد في الدنيا.. والدة صغير مريض بضمور العضلات تستغيث لعلاجه: محتاج 13 مليون جنيه وحساباته قربت تتقفل
استغاثت سيدة من محافظة القاهرة لعلاج نجلها من مرض ضمور العضلات دوشين، بعد اكتشاف إصابته منذ عامين.
والدة صغير مريض ضمور العضلات تستغيث لعلاجه
وقالت والدة الطفل أحمد هاني، في تصريحات خاصة لـ القاهرة 24: أنا ست وحيدة، بعد ما زوجي توفي اكتشفت إصابة ابني بمرض ضمور العضلات دوشين، والمرض ده بيأثر على حياته كلها وبيموته بالبطئ، وأنا اللي مسئولة حاليًا عن ولادي من كل شيء، ولو بعت اللي ورايا واللي قدامي عمري ماهقدر أجمع تمن العلاج أبدًا.
وأضافت: حسابات ابني خلاص قربت تتقفل، ومتجمعش من تكلفة الجرعة الأولى اللي قيمتها 13 مليون جنيه حاجة، عشان كده بستغيث بالناس تساعدني، أنا تقريبًا خبطت على كل الأبواب اللي في الدنيا عشان حد يقف جنبي ويسندني بأي مصاريف تقدرتعالجه لكن ملقتش، وبعد مبلغ الجرعة الأولى في جرعتين تانين وأنا ست على قد حالي أجيب منين.
وتابعت: ابني بيموت قدامي بالبطئ ومش عارفة أعمل أي حاجة ولا أساعده، لأن ظروفي صعبة وبشتغل عشان ولادي، ونفسي ابني يعيش ويكمل حياته بشكل طبيعي، يا ريت الناس كلها تدعمني وتساعدني في علاجه.
