مش قصدي أتاجر بولادي.. صاحبة فيديو بيع الأطفال الأربعة تكشف كواليسه
تداول مستخدمو السوشيال ميديا، خلال الساعات القليلة الماضية، فيديو لأم تعرض أطفالها للبيع عبر منصات التواصل الاجتماعي، ما أثار حالة هجوم واسعة على منصات التواصل الاجتماعي ورفض كبير.
صاحبة فيديو بيع الأربع أطفال تكشف كواليسه
وقالت والدة الصغار في تصريحات خاصة لـ القاهرة 24: يا جماعة مش قصدي أبيع عيالي دول نور عنيا وكل اللي ليا في الحياة، وأبوهم سايبهم بقاله 6 سنين مش عايز يصرف عليهم، ومش عارفين نعيش ولا عندنا مصدر دخل تاني، وماكنش الغرض في الفيديو إني أبيع أو أتاجر بعيالي.
وتابعت: القصة كلها إن التعبير خاني ومستحيل أي أم تبيع عيالها، أنا بس كنت عايزة أوفرلهم حياة كريمة وعيشة يستحقوها، لأن حياتنا اتدمرت بسبب أبوهم وهنطرد من الشقة اللي عايشين فيها، لأنه مش بيدفع إيجار ومعنديش شغل أو مصدر رزق أعيش منه.
وأضافت: كنت شغالة في مركز تنظيف بشرة لكن مشوني عشان كل شوية كان عندي قضايا ومحاكم ودلوقتي إخواتي بيصرفوا عليا، ومعنديش مصدر دخل ليا ولولادي وكل هدفي إنهم يعيشوا مع أسرة تحققلهم حياة كريمة ويكونوا زي أي حد في سنهم.
