أحمد العوضي: مبيهمنيش أبقى غني المهم الناس تحبني.. والغرور مينطبقش على كلامي إني الأعلى أجرًا
علق الفنان أحمد العوضي، على الجدل الذي أُثير خلال الأيام الماضية بعد تصريحاته بأنه الأعلى أجرًا ومشاهدة والأكثر بيعًا، معربًا عن استغرابه الشديد بـ وصفه بالمغرور.
وقال أحمد العوضي، في لقائه مع الإعلامية إسعاد يونس، في برنامج صاحبة السعادة: أنا كنت فاتح اللايف مع إخواتي وقلت بفضل ربنا ودعمكم ليا وأنا النهاردة ربنا أكرمني أنا الأعلى مشاهدة في رمضان والأكثر بحثًا على جوجل والأكثر مبيعًا والأعلى أجرًا، بكلم إخواتي وبقولهم بصوا وصلت لـ إيه بدعمكم وفضل ربنا مش شطارة مني، وطلع ناس قالت ده مغرور وجنون العظمة أصابه.
وتابع: طيب أنت تعرف إيه هو الغرور قبل ما تتكلم، الغرور ده حاجة مش عند الآخر، هو الأهلي والزمالك لما الأهلي بياخد الدوري مش بيتقال أنه متربع؟، ما هو تعب لغاية ما وصل، هل كده الأهلي بيكيد في الزمالك؟، أكيد لأ، فكلمة الغرور متنطبقش على كلامي.
وأضاف: صفحتي على الفيس بوك أقوى صفحة في مصر بفضل ربنا، ولو نزلت مشهد مثلًا جاب 80 مليون مش من حقي أفرح بـ ده؟، في جزئية من الناس بتعتقد خاطأ أن العامة تتبع النخبة، فأنت لما تصدر لهم أن العوضي مغرور ووحش فأنت مهئ ليك أن العامة هتتبعك ده لأ لأنك لا تتبع النخبة، والعامة لا تتبع التفاهات.
أحمد العوضي: عمر ما كان عندي مشكلة مع زميل ليا
وأوضح أحمد العوضي، أنه لا يوجد أي خلافات مع زملائه في الوسط الفني، قائلًا: أنا بحترم كل زملائي، وأنا دلوقتي لو رقم واحد بفتخر بـ ده، وبكرة ممكن زميلي يبقى رقم واحد وأنا رقم اتنين ومن حقه يفرح بـ ده، وعمري ما كان عندي مشكلة مع زميل ليا.
واستنكر أحمد العوضي، انتقاد تقديمه شخصية صنايعي رخام، قائلًا: نغمة طلعت السنة اللي فاتت أن أنا شبه الصنايعية، يا عم أنا بفتخر أني شبه الصنايعية، أنا طالع من وسط الناس الشعبية وعمري ما أنكرت، ولو مكنتش أبقى ممثل هحب أبقى صنايعي، أنا الناس بتحبني علشان قريب منهم، أنا بنزل وسط الناس علشان بحبهم.
أحمد العوضي يعلق على انتقادات مسابقاته
وعلق أحمد العوضي، على انتقادات مسابقاته، قائلًا: بيقولوا أني بعمل مسابقات علشان الناس تتفرج على مسلسلاتي، طب أسلفك وتعملها؟، والعشرة دول ما يهون عليه جنيه، متجيش معاك مش هتعمل
وتابع: ميهمنيش أبقى غني، اللي يهمني أن الناس تحبني، والناس بتصدقني، واللي زعلان أن الناس مصدقاني بيحاول يشككهم فيا وده مش هيحصل، لأن الناس مشافتش مني حاجة وحشة.
واختتم أحمد العوضي: معروف عني أن كل مسلسلاتي نهايتها ضلمة، فالناس اتضايقت وبقيت آخد من النقد ده رأي إخواتي اللي بيتفرجوا عليا، طبيعي ماخدش نقد من حد مبيتفرجش عليا ولكن متنكرش نجاحي.
