بكاء عمرو مصطفى خلال حديثه عن تصالحه مع عمرو دياب: أديته كل حياتي.. وأحلى أغانيّا كان بياخدها
تحدث الفنان والملحن عمرو مصطفى، عن تصالحه مع الهضبة عمرو دياب، وذلك بعد الخلافات التي نشبت خلال السنوات الماضية، موضحًا أنه بعدما تعرض لأزمة صحية كبيرة خلال الفترة الماضية أدرك وقتها أنه لا قيمة للخلافات وتصالح مع الهضبة، معربًا عن حبه الكبير له وتقديره لعلاقة الصداقة والأخوة التي تجمعهما.
وبكى عمرو مصطفى، خلال حديثه مع الإعلامي معتز الدمرداش، في برنامجه ضيفي، قائلًا: من كتر حبي في عمرو دياب، حصل اللي حصل، أنا اكتشفت ده بعد ما تعبت واكتشفت أني بحبه أوي، هو أخويا ولما كتبلي بوست خلاص كل الزعل راح ولا كأن حاجة حصلت، وهو لما بيغني كأن أنا بغني لأني عايز أغني، فكنت الأول بزعل ولكن دلوقتي ولا أي زعل.
وأضاف عمرو مصطفى: عمرو كلمني قبل ما يكتبلي بوست وهزرنا، وأنا اديته كل حياتي وأغانيا كلها وأحلى حاجة بتطلع على طول كان عمرو بياخدها، وساعات سميرة سعيد ومحمد حماقي.
عمرو مصطفى: إحنا كفنانين المفروض ننشر الخير والسلام مش الخناق والحقد
وأكد عمرو مصطفى، أنه أصبح ينظر للحياة بمنظور آخر بعد وعكته الصحية الأخيرة، قائلًا: بعد أزمتي الصحية شفت الحياة بـ فلسفة مختلفة، بصيت لـ أنا ليه أتخانق وليه أزعل من حد وليه أتنرفز؟، بصيت أن عمرو مصطفى أكيد ربنا إداله الموهبة علشان هدف في الحياة، المفروض أننا كفنانين ننشر الخير والحب والسلام، الفترة اللي كنت فيها عندي الخناق والزعيق وكنت تصادمي وبزعق والحقوق، اكتشفت أن ربنا قالي أنا إديتك الموهبة علشان الخير والسلام مش الزعيق والخناق والحقد، ولما اتصالحت مع الناس لاقيت الناس بعتتلي بتقولي أنهم اتصالحوا مع اللي كانوا زعلانين منهم، فعرفت أن تفكيري كان صح.
