رامي وحيد: فترة وجودي بأمريكا كانت مليانة ضغط نفسي لكنها أكدت موهبتي
تحدث الفنان رامي وحيد، عن فترة سفره إلى الولايات المتحدة الأمريكية، ومشاركته في عملين سينمائيين، موضحًا أنه طوال العامين كان يحلم بالعودة إلى مصر ولكنه صمم على تحقيق حلمه السينمائي.
وقال رامي وحيد، في لقائه مع القاهرة 24: التمثيل تعامل زي أي تعامل حقيقي في حياة الإنسان، وفترة تواجدي في أمريكا ومشاركتي في أعمال هناك كانت فترة فاصلة في حياتي، لأني اتنقلت فيها لمرحلة أخرى، وكانت فترة صعبة لأن المستوى اللي اتعرض عليا مكنش ده اللي أنا بحلم بيه، فكانت فترة صعبة ومليانة ضغط نفسي كبير لأني كنت ببقى عايز أرجع مصر، وعمري ما تخليت أني هقدر أقعد سنتين برا مصر.
وتابع رامي وحيد: اتعلمت حاجات كتير جدًا وإتأكدت من أن الفن مالوش لغة ولا مستوى ولا أفق، عملت فيلمين في أمريكا، وكانوا خطوات مهمة جدًا في حياتي لأنها قائمة على فكرة أن محدش عارف أنت مين ولكن بتسجل مشهد وتبعته لمخرج وبيختارك من ضمن آلاف، وده اللي بيأكد على موهبتي، وبحضر لأعمال تانية هرجع أستكمل تحضيرها وتصويرها.
رامي وحيد: فيلم حلم العمر عاش مع الجمهور بقاله 17 سنة
وعلى جانب آخر، سبق وتحدث الفنان رامي وحيد، عن فيلم حلم العمر الذي شارك في بطولته رفقة الفنان حمادة هلال، معلقًا على تداول الجمهور من جديد مشهده الشهير “يا نور”، الذي قدمه خلال أحداث فيلم حلم العمر، بجانب حديثه عن اقترانه بـ أدوار الشر، قائلًا: فرحان إن الفيلم اتعمل سنة 2009 وحقق نجاح كبير وموجود مع الناس بقاله 17 سنة، كل حدث بيحصل الناس فاكرة كوميك "يا نور"، والكلام اللي كنت بقوله في الفيلم كان تلقائي، وحبيت النجاح وخفة دم الناس.
