عمرو مصطفى: متعلمتش موسيقى ولا أعرف مقامات.. ومراتي رزق من ربنا وهعملها تمثال
كشف الفنان والملحن عمرو مصطفى، لأول مرة، عن عدم دراسته للموسيقى، موضحًا أن سبب تميزه التلحيني، هو موهبته ومشاعره، بجانب الحديث عن الهضبة عمرو دياب، بالإضافة إلى حديثه عن زوجته.
عمرو مصطفى: متعلمتش موسيقى
وقال عمرو مصطفى، في لقائه مع الإعلامي معتز الدمرداش: أنا مش دارس موسيقى، ومعرفش السلم الموسيقي ولا النوتات ولا المقامات الموسيقية ولا الهوا، اللي بيشغلني مشاعري، واللي يعرف تشغله مشاعره يوريني، وأنا مبسوط ومش عايز أتعلم، واللي يعرف يعمل زيي يعمل.
وأوضح عمرو مصطفى، أنه كان السبب الرئيسي في عمل عدد من أشهر الموزعين مع الهضبة عمرو دياب، قائلًا: أنا وعمرو دياب من أول ما دخلنا المزيكا ناقر ونقير، ولما بقوله يمين من قلبي والله ويعمل هو حاجة تانية، هو دماغه كده، ومعظم الموزعين اللي تعاونوا مع عمرو دياب كنت أنا سبب في وجودهم معاه.
عمرو مصطفى: مراتي رزق من ربنا
كما تطرق عمرو مصطفى للحديث عن زوجته، قائلًا: مراتي لازم يتعملها تمثال، وأنا هعملها تمثال في البيت الجديد، لأن هي دي بعد أمي الله يرحمها هي اللي شكلت عمرو مصطفى واللي كانت بتوقفني، دي كل حياتي معاها، وولادنا بيدرسوا في لندن وهي أم مثالية ودي من الرزق اللي ربنا إداهوني، وأنا أول ما شفتها قلتلها هتجوزك وبعد أسبوعين كان الفرح، كانت جدعة أوي ولما رحت أطلب إيديها قعدت مع خالها لأن والدها متوفي، ودفعت المهر لـ خالها وأنا ماشي رجعتهولي وعرفت من وقتها أن دي مراتي.
